كلنا تعبانين من ازمة الكهربا الفترة دي يارب يعديها على خير ومن ساعة كده قريت موضوع لبنوته بتقول ان جارتها عندها تلات تكيفات طبعا بيسحبو كهربا جامده قامت الست هانم موصلة كهربتهم بالعمود العمومي بتاع الشارع يعني بتسحب كهرباء الشارع ببلاش عشان تشغل تلات تكيفات ببلاش طبعا البنوته دي ربنا يكرمها دخلت تستشير اعضاء المنتدى تقولهم ابلغ عنها ولا لا لان جارتها دي بتوز صحابها كمان يعملو زيها وتقولهم محدش هايعرف حاجه
طبعا الموضوع واضح .. دي سرقة وقلة تحضر وحاجه حرام لكن الي حرق دمي بقه ان بعض الردود الي جتلها بيقولوله عادي ماتبالغيش ووحده بتقولها انتي غيرانة منها ووحده بتقولها حرام عليكي دي ممكن تاخد غرامة او تتسجن >> ياحنيتك ياختي خايفين على واحده حرامية انها تدفع غرامه لانها بتسرق حق الشعب كله ومش عارفين ان هي والي زيها هما الي بيعلو ضغط الكهربا فابتقطع لان كهرباء مصر اصلا ضعيفة لوحدها
ايوا بتسرق حقك .. الكهربا دي بتاعة الـ 90 مليون كلهم ومادام عاوزا تلات تكيفات يبقى تدفع تمنهم او تكتفي بواحد الحاجه التانيه بقه مولدات الكهربا الي بتتوزع ع البلد بيشتغل فيها عمال ومهندسين على مدار الساعة لما بيحصل ضغط عالي سعات بتنفجر وفيه ناس بتموت يعني الست دي والي زيها ممكن يتسببو في قتل ناس ابرياء علشان سرقتهم
( المال الساييب يعلم السرقة ) هي عارفه كويس انو حرام وغلط وعارفة العواقب القانونية كويس لكن عارفه كمان ان محدش هايتكلم فاتعيش حياتها بقا انت سايب حقك ومحدش عاوز يبلغ عن كل واحد بيعمل كده يبقى طبيعي جدا تسرق ليه لا يعني ؟ يبقى انت الي تستاهل ان كهربتك تتقطع
( الساكت عن الحق شيطان اخرس) ايوة حق .. ليه هي الي بتعمل حرام وغلط عنيها قوية وبتنصح الناس بيه كمان وحضرتك يالي عارف الصح والحلال بتطاطي راسك ؟ مهو عشان كده الغلط بيزيد في البلد ومش عاوز يقل لأن الاية اتقلبت بقو اصحاب الغلط والحرام اقوياء وبيعيثو في الارض فساد واصحاب الصح والحق بيستخبو ورا اعذار وهمية زي الي خايفين على مشاعرها لما تدفع غرامة
( ان الله لا يغير مابقوم حتى يغيرو مابأنفسهم ) لو ربنا بعتلنا رئيس من السما مش هايقدر يصلح البلد برضو لان ببساطه مش عنده 90 مليون عين يراقبنا بيهم فين ضميرك ؟ فين اخلاقك الي اتربيت عليها ؟
فين ثقافتك وتعليمك الي اهلك سهرو عليك سنين علشان تتعلمه كل ده يخليك مش عارف ان جارتك بتسرق ؟ وان ليك يد في الموضوع طول مانت ساكت عليه
(من امن العقوبة اساء الادب ) طبيعي جدا لما الواحد يغلط مرة واتنين ومايلاقيش رد فعل يوقفه عند حده ده هايخليه يكبر بجريمته اكتر وسوق فيها امال هايتطبق امتى القانون ده طول ماكل واحد خايف على حرامي ما ؟ خلاص يبقى مانزعلش بقه لما نتسرق ويتاكل حقنا ماحنا السبب
(الفرق بين ستر المؤمن وبين التستر على المخطئ ) وحده قالتلي عيب تبلغي عنها ده من ستر مؤمن في الدنيا ستره الله يوم القيامه طبعا ده حديث جميل جدا لكن ستر المؤمن ده يعني مافضحش مشكله خاصة بيه هوا لكن لما يأذيني ويأذي ناس تانيني يبقى كده مش داخل تحت الحديث ده نهائي النبي قال (لو ان فاطمة بنت محمد سرقت لقطعت يديها ) ودالوقتي ماحدش بيقطع ايد حد لكن بتدفع غرامه او عقاب يربيها ماتكرروش
يعني ماتخافش عليها النبي قال هايبلغ عن بنته فمابالك بالجار لو هي بتأذي نفسها بس يبقى انا ماليش الا انصحها بس ماينفعش اعمل اي حاجة تانية حتى لو اختي بس انصحها وهي حره وليها عقل تفكر بيه لكن لما تكون بتأذي ناس كتير يبقى ده خرج عن نطاقها وليا حق بقه اتدخل بطريقة قانونية كويس
(الفرق بين حق جاري وحقو عليا ) ربنا هايسألك يوم القيامه يقولك ماغيرتش المنكر ليه ؟ هاتقوله حقو الجار ؟ هاييقولك هو النبي علمك ان من ضمن حقوق الجار تسكت على الحرام الي بيعمله ؟؟ لا .. يبقى اتعاقب زيها زي ماسكت رغم ان كان في ايدك تبلغ او تغير المنكر ده مش صعبه وهي نفسها هاتقف تحاجك امام ربنا وتقولك انت عارف ان ده حرام وسكت لان كان في ايدك تغيره وماعملتش حاجه تعالا هنا بقه وهاييبقى معاها حق على فكرة
( الجزاء من (كلمة غير لائقة) العمل ) دي كهرباء يعني مصيبتها تجيب الاجل .. واصلا خطر جدا الموضوع ده ممكن تنفجر فيها وفي ولادها لا سمح االله وبدل ماكنت خايف عليها تدفع غرامه هتمشي في جنازتها والحرام بيدخل يقعد في اخر البيت وهوا خارج بياخد الحلال في رجلية يعني انت لو فعلا بتعزها لازم تتصرف دي بتعمل ذنب عظيم واخرته وحشه ماتستغربش لان ماضيعناش الا استقلالنا بالذنوب لحد لما بقينا مابنفرقش بين الكبائر وغيرها
طيب تعمل ايه ؟ الاول انصحها مره واتنين وعشرة وافهمها العواقب القانونيه واخوفها وبعد كده واروح ابلغ من تلفون عمومي واقولهم ( في الشارع الفلاني فيه ناس عاملين كذا كذا تعالو حلو الموضوع ده ) هما مجرد ماهايجو يبصو بصة ع العمود هايفهمو مين الي سارق وصله وهايشوفو شغلهم معاه لا تقول انت مين ولا هي مين وريح نفسك
حااجه اخيرة افضفض بيها .. وحده قالتلي في الموضوع ان كلامي مقنع الى حد ما لكن هي مش هاتاخد بيه علشان انا مش بدرس شريعة
فاكده انا بكون مانفعش افتي او اتكلم في حدود ربنا عيب لازام اكون دارسة شريعة والا ما تصدقنش لو قلت ان السرقة حرام
دنا يارب عندي مراارة وحده يارب يصبرها
وصل بينا الحد اننا حتى مش عارفين السرقة حرام ولا حلال وبنلخبط بين ستر المؤمن وبين التستر على حرامي بقينا نعبد المفتي والمشايخ بدل ربنا ومش عارفين اقل حدود ديننا الي اي حد بيقرأ قران هايعرفهاوالي واضحة وضوح الشمس او نفكر ونشغل عقولنا بقينا نعبد الفتاوى حتى في اصغر حاجه غنا ربنا قال ( اسألو اهل الذكر ان كنتم لا تعلمون ) لكن قاال برضو (أفلا يتدبرون القرآن أم على قلوب أقفالها )
ربنا يزيدك ايمان وتقوى وتاخد بيها ولو عندك جارة بتعمل كده تبلغ عنها فورا وماتخافش عليها خاف على نفسك الاول لا تتحاسب على ذنبها كأنك عملته لمجرد انك سكت عليه
اخيرا سامحوني لو كنت قصرت او طولت بس منها فضفضة ومنها تستفيدو وتاخدو بالكم ونبطل سلبية بقه وناخد حقوقنا كاملة حتى اصغر حاجه المهم بالطريقة الصحيحة